1. Kod yozish bu hali hammasi emas
Junior bu IT sohasida dasturlashni endi boshlagan, tajribasi yo’q yoki minimal ish tajribasiga ega bo’lgan axborot texnologiyalari bo`yicha mutaxassis hisoblanadi. Dasturlashni o’rganishdan oldin hamma qiyinchiliklarga tayyor turish va juda katta sabr-bardoshli bo’lish talab qilinadi.
Siz dasturlashni nima uchun o’rganmoqchi ekanligingizni yaxshilab tushunib olmog’ingiz lozim. Agar siz maqsadingiz sari olg’a qadam tashlab har qanday qiyinchiliklarni yengib o’tsangiz, kelajakda tajribali mutaxassis bo`lib yetishasiz. Buning uchun maqsadingiz pul topish bo’lib qolmasligi kerak. Dasturlash ham bir san’at ekanligini va kelajakda u orqali qanchadan-qancha insonlarga foydangiz tegishini bilishingiz lozim.
Dasturchilar loyiha rahbari tomonidan ularga aniq topshiriq berilishini xohlashadi. Chunki bunday topshiriqlarni vazifadan chalg’imagan holda bajarilsa yaxshi natijaga erishish mumkin.
2. Dasturlashni mustaqil o’rganishning afzalliklari
Bugungi kunda ijtimoiy tarmoqlarda dasturlashni mustaqil o’rganish uchun talaygina bepul kurslar mavjud. Mustaqil o’rganishning afzalligi o’zingiz istagan vaqtda internetda dasturlash bo’yicha saytlar yoki bloglardan onlayn tarzda ko’rib borishingiz mumkin. “You tube”da ham anchagina darslar bisyor. Bir vaqtlar dasturlashni o’rganish kurslari deyarli bo’lmagan, bo’lsa ham juda oz va narxi qimmat, uni ustiga internet ham hali rivojlanmagan davr edi. Endi esa dasturlashni o’rganish uchun ochiq saytlar, pullik va bepul kurslar ko’payib ketgan. Bizning yurtimizda ham yoshlarga dasturchilik sohasi uchun keng ko’lamdagi ishlar amalga oshirildi. Shu yil 28 aprelda Davlatimiz rahbarining “Raqamli iqtisodiyot va elektron hukumatni keng joriy etish” qaroridagi vazifalarni sifatli amalga oshirish uchun chora-tadbirlari belgilangan edi.
Ushbu qarorning bajarilishi ijrosi bo’yicha O’zbekiston Respublikasi Prezidenti Shavkat Mirziyoyev huzurida 9 iyun kuni “Axborot texnologiyalari va raqamli iqtisodiyotni rivojlantirish” borasidagi islohotlar ijrosi bo’yicha taqdimot bo’lib o’tdi.
Prezidentimiz ta’kidlaganidek bugungi kunda sohadagi maqsadlarga zamonaviy dasturchilar tayyorlashni jadallashtirish orqali erishish mumkinligi qayd etildi.
3. Dasturlashni o’rganishda qanday imkoniyatga ega bo’lasiz:
- turli xil saytlar yaratishni o’rganasiz;
- loyihalaringiz uchun dasturchiga ishingiz tushmaydi;
- ilovalar, Web saytlar va boshqa loyihalar bilan o’zingiz shug’ullanasiz.
Mashhur kompaniyalar senior darajadagi dasturchilarga katta maosh taklif qiladilar. Chunki dasturchilar katta-katta loyihalarnini amalga oshirib beradilar. Bundan tashqari yana juda ko’p yutuqlarga erishadilar, xususan zamonaviy texnologiyalar rivojlanayotgan davrda, har bir texnologiyani dasturini ishlab chiqish (masalan, suniy intellekt, dronlar, robotexnika, tibbiyot ta’lim sohalarida) yangiliklar yaratish uchun dasturlash katta imkoniyatlar beradi.
Agar siz shaxsiy rivojlanishga harakat qilsangiz hech qachon dasturlashdan zerikmaysiz. Siz birotra texnologiyani o’rganguningizga qadar yana boshqa kuchliroq texnologiya paydo bo’ladi. Siz o’z ustingizda ishlashda to’xtab qolmasligingiz kerak. Doim bir ishni boshladingizmi, masalan, kod yozishni chala qoldirmay uni oxirigacha mukammal darajada tugating. Bir joyda to’xtab qolgandan, har on yangi bilimlar uzra professional dasturchi bo’lishga nima yetsin.
Shunday qilib, dasturlash, sizni doimiy tarzda dasturlash bo’yicha yangi kodlar, tillarning texnologiya olamida bo’layotgan o’zgarishlarni o’rganishga undaydi. Qancha tajriba orttirisningizga qaramay dasturlash yangiliklar va yangi kodlar, funksiyalar bilan qiziqtirib boradi.
4. Dasturlashda ingliz tili kod yozish kabi muhim.
Dasturlash uchun ingliz tili muhim o`rin tutadi. Agar bilmasangiz unda ingliz tilini boshlang’ich kurslarini o’qib o’rganib qo’ysangiz kod yozishda katta foyda beradi. Chunki kodlar ingliz tili harflarida yoziladi. Bundan tashqari yanada bilimingiz mustahkam bo’lishi va kelajakda professional “senior” darajadagi dasturchi bo’lish imkoniyatini beradi.
Qanchalik kuchli bilimga ega bo’lsangiz shuncha ko’p imkoniyat eshiklari ochiladi. Bilimingiz rivojlangan sari daromadingiz ham oshib boradi va xohlagan rivojlangan tashkilotga borib ishlash imkoniyati tug’iladi hamda obro’yingiz ham ko’tariladi. Rivojlangan IT kompaniyalar dasturchilarini har 6 oyda bilimini kuzatib turishadi.
Xullas dasturchi dunyoni tark etgandan keyin ham uning bilimlarini o’zidan keyingilarga kelajak avlod o’rganishida ham savobi yetib turadi.
Xulosa qilib aytadigan bo’lsak, siz dasturchilikni qunt bilan o’rganishda hech qachon to’xtab qolmang, oldinga qarab izlaning! Maqsad qo’ying. Shu maqsadingiz sari davomli tarzda bilimingizni rivojlantiring. Agar mana shu qiyinchiliklardan sabr bilan o’tib olsangiz kelajakda yaxshi sharoit, dunyoni sayr qilish, farovon hayot kechirish sizni kutmoqda!
Eng ko’p o’qilgan maqolalar